我的離教書目推薦

我的智商

IQ Test
Free-IQTest.net - IQ Test

Monday, October 07, 2013

一個死後生命的故事(虛構)

這個故事是我的創作,是虛構,但我相信裡面的情節真實的世界也會有發生,這故事裡面的人們,也許你在身邊看到多少他們的影子。


在寧養院病房中,一片嘻笑。因為新來的病人是個樂天的婆婆。


醫護人員叫她虎媽,因為她的大兒子名字有個「虎」:劉健虎。


「嗨,虎媽,早晨!」健虎的老友大鼻明這天探虎媽。

「死仔!做咩而家先蒞探我?你死X左去邊!」說著馬上伸伸舌頭,尷尬的看看旁邊的院友。

 

 虎媽真名叫許玉美,丈夫本來在地盤工作,在她生下大女、兒子健虎、和幼子健熊不久後就因為工業意外身亡。

丈夫沒有多少積蓄,虎媽許玉美在丈夫死後只是用他獲得的賠償買下一間小屋,然後一個人打工,洗碗、清潔、雜工等等,養大幾個子女。

因為虎媽一直在基層工作,所以不免學得些粗話,她只是和要好的人才說。她不是罵大鼻明,是看到他來很開心。虎媽笑得瞇瞇眼。

虎媽當大鼻明是自己的兒子一樣。

大鼻明看到虎媽開心,都安樂些。

虎媽患上末期肝癌,本來是她子女負責輪流去寧養院探她。但最近大鼻明和健虎談,發覺健虎很不開心。

健虎在中學信了基督教,十分虔誠,還帶了家姐和弟弟信耶穌。三姐弟一直希望媽媽都信。不過虎媽一手一腳養大他們幾個,做過很多工作,見過很多事,做人很實際。

「你啲咩野死後復活啊、罪得赦免,都唔實在嘅。人嘅生老病死,你看得多,就知道真係閒過立秋啦。你死鬼老豆,佢死嗰日上晝都好地地,同我飲埋個早茶開工。 平時地盤佢做野不知幾鬼穩陣,安全過行騎樓擔遮帶頭盔,個個工友都唔信佢出左事。就偏偏咁啱嗰日他頂上個位個工友唔記得釘返好個地台板。平時你老豆一定咩 都 check 真先開工,嗰日就偏偏冇check 嗰零零丁丁嗰一塊版,一踩上去塊版走位,個人一側就由五層樓高跌鬼左落地....還要咁啱條安全帶綁正個位又鬆左....真係整定㗎」

健虎一同虎媽傳福音,就算帶埋傳道,虎媽就講往事。

「仲有啊,你老豆拜關二哥嘅,你嗰個耶穌話佢會落地獄,咁你都忍心信?」

健虎的教會傳道說:「伯母,耶穌就係愛你,所以先唔忍心你落地獄,叫你信咋!」

「你個耶穌係真咁把砲啊,晨X早,阿咩當話?佢嗰日一 dep 個果,就應該即刻補鑊、使咩等到依家?好似我教阿虎,佢家姐健玲,細仔阿熊,一有尐尐行差踏錯,點會比佢繼續錯落去,梗係教、拉返佢轉頭....」

教會傳道說:「咁耶穌依家咪來拉返你轉頭....」

「咁唔見耶穌來拉返我老公轉頭?等咩話?幾千年?」

教會傳道:「神有佢奧秘的旨意....」

「奧秘呢家野就唔實際嘅,我唔知我犯咩罪,唔明亞咩當食個果我就要一齊有罪,仲狼過以前啲皇帝株九族!我成世冇害人,貪下小便宜就有,我冇法子喎,我地 窮!但咁都要我落地獄,有冇蠻啲啊?好似我教仔,阿虎細個曳,唔做功課,我最多罰佢冇得睇卡通、出去玩,用你地個耶穌啲教仔法教仔,我咪小小野要拎菜刀斬 仔?」

教會傳道:「得罪神,係最大嘅罪。聖經係神寫嘅,係真理,你只有信....」

「你話之嗎....口講口賠啊。我真係唔明我得罪神咩囉。你隨街都搵到幾圍檯嘅人係得罪我嘅,我都冇諗過要人地個個比火燒咁狼毒啊.....」

教會傳道:「得罪神,係最大嘅罪。神呢啲係公義....」

「宰相肚裡可撐船,我多多人得罪我,都可以笑下就算,你個耶穌話係最偉大嘅神,點會小氣過我呢個普通阿婆?」

教會傳道:「....................」

教會傳道和健虎之前都不斷同虎媽傳福音,不得要領。虎媽讀書不多,但很精靈,問那些刁鑽古怪的問題,連教會傳道都無法回答。

大半年前,虎媽被驗出患末期肝癌,後來轉去寧養院。人人都知道那裏是末期癌症病者等死的地方。

健虎和健熊知道媽媽時日無多,都很心急。結果一次探望,健虎逼得虎媽太緊,同虎媽鬧大交。之後虎媽就見親健虎面色仲黑過鑊嘮。

大鼻明自小同健虎老友,還一起返教會,不過大鼻明就是教會出名的「問題會友」,聚會冇定時、不讀經,喜歡「賭波」,同健虎的虔誠天同地比。不過,健虎知道媽媽喜歡大鼻明。

「你自己激親你老母要我出面?」

「唔該啦,呢兩日探阿媽,唔係單打我,就唔睬我同細老...」

「老人家,過兩日冇野嘅啦,你家姐呢?」

「家姐兩年前,同阿媽嘈完,一個人去左澳洲...我通知左佢...但佢冇咁快可以過來...〕

大鼻明就做和事佬,去探虎媽。

虎媽一看見大鼻明就好高興,兩個人年紀相差大,不過好老友。

「虎媽,做咩一見我就爆粗啊?」大鼻明笑道。

「死仔,我就來悶死啦。有你同我吹水不知幾正!來來,吃個橙!」

兩人談笑一會,虎媽問:「我知,你係唔係來幫阿虎講好說話?」

「虎媽,阿虎都係緊張你啫。你唔信耶穌,第日死左,你地就分開啦....」

「我想阿虎,帶靖曦同靖思來探我....」

靖曦同靖思,是健虎的一對仔女,虎媽的孫仔孫女。

虎媽很疼愛這對孫仔孫女,靖曦同靖思也好喜歡跟這個鬼馬嬤嬤玩。不過,健虎很怕讓自己子女和這不信耶穌的嬤嬤見那麼多面,怕子女學嬤嬤不信,因為虎媽幾次比教會傳道煩,有時候忍不住批評基督教幾句,靖曦同靖思很受鬼馬嬤嬤影響,不斷對父親講:「嬤嬤點解唔信?」

虎媽入院後,成日想健虎帶對孫仔孫女探她,健虎老大不願意。

上次吵架,健虎就是太急要媽媽信,竟然說:「你信耶穌,我就帶靖曦同靖思來探你...」一講完,健虎馬上就後悔。

虎媽很氣憤:「你個耶穌教你用我對孫仔孫女要脅我?」

健虎不說話,就走了。

大鼻明:「佢都好後悔啊。其實,信耶穌有咩唔好喎?你信,有永生、永遠快樂,仲可以永遠同你愛嘅人一齊...」

「我,最唔捨得,係我對孫仔孫女,仲有,我大女阿玲。我兩年來都冇同佢講過一句野.....」

大鼻明:「咁咪係囉。阿玲信耶穌,你對孫仔孫女信耶穌,你如果又信耶穌,將來響天家,都可以同孫仔孫女、阿玲地一齊,唔再分開....」

虎媽眼睛一亮,看著大鼻明。

這天,寧養院裡面,健虎、健熊,教會傳道都在。

教會傳道說一句,虎媽跟著說一句,就完成「決志禱告」。

教會傳道伸手握著虎媽的手,說:「恭喜你,你現在是神家嘅人,係天父的兒女,你肯定有永生!」

健虎、健熊好開心。

教會傳道:「我走先。你地自己傾下。」

健虎、健熊繼續不斷說話,講好多信仰的東西比虎媽知。

「唔好賭馬賭波、唔好爆粗、唔好拜神...」

「食野前記得謝飯、每日靈修....」

「劉健虎!請你唔好走數!」

健虎、健熊一呆。母親好少指名道姓叫他們的。

「媽...」

「你講過,我信耶穌嘅話,你就會帶靖曦、靖思蒞探我....」

「遲啲啦,小朋友學校好多功課同活動,要安排....」

虎媽面色一變,說:「我好掛住靖曦、靖思,你咁都要阿茲阿左?」

「哥哥唔係話唔帶...」健熊馬上幫哥哥解圍。

「咁幾時?」

「我會同學校講,取消佢地課外活動,放左學來....」

虎媽面色頓和。

健虎、健熊離開。病房內一直有個看護留意著這家人。

虎媽看到她。她不到三十歲,束著短髮,但面上很滄桑。

虎媽對她眨眨眼,說:「姑娘,你過來!」

她面上平靜,微笑一下,走過來。

「你有咩唔舒服?」

「冇,我來咁耐,都係你照顧我,你好細心,我好多謝你。我想同你傾下計....隔離床阿梅姨去左,日頭冇人同我吹水啦....你坐低同我嗲幾句得唔得?」

「同你傾幾分鐘都OK....」

「姑娘點稱呼?」

「叫我阿雲得啦...」雲淡淡說。「佢地你啲仔?」

「我三個仔女,剛剛蒞兩個仔,另外嗰個我個仔教會啲傳道人....」

雲面上淡然。虎媽見識多,鑒貌辨色,看出雲並不太信服基督教。剛才虎媽在兒子和傳道面前決志,雲就一直在附近。虎媽知道雲在聽。

「我都係順個仔意,真正老來從子....」

「如果你覺得信令你安樂....」雲微笑。

「我咩都冇所謂,但我對孫仔孫女係我命根,我真係好想佢地蒞探我....我好唔捨得佢地」

「係啊,你而家病情穩定,精神狀況同身體都仲OK....」雲說,然後她轉面看走廊。

「我細佬走嗰陣,得廿二歲..」雲說。

虎媽說:「唉.....咁後生....」

「我,就剛剛做實習.....醫院成日好多教會的人,叫臨死嘅人信耶穌....我細佬比我個妹同阿媽佢教友煩左好多日....」

「咁佢有冇信到?」

「細佬最大嘅心願,係去澳洲大堡礁潛水、去美國大峽谷.....,細佬唔肯化療,因為好翻機會渺茫,所以寧願趁身體仲可以去旅行,去完成自己心願。我就帶佢去左澳洲大堡礁、去美國大峽谷,還有,去加拿大探左阿爺....」

虎媽說:「雲,你細佬有你這個家姐真係好....」

「我個妹同阿媽就話我魔鬼,話我阻住細佬信耶穌,話我自己背叛耶穌自己滅亡仲唔夠....我冇同佢地見面成四年」

虎媽沉默,伸手輕輕摸了雲的右手。

雲轉過來,面上仍然平靜,說:「我不信有神,或者有咩永生,我看到好多人受苦,但仲要呃自己同親人話有死後生命。錯過晒今世....」

「我買個保險啫...」

「你唔好誤會,我明白嘅,有邊個捨得最親嘅人....所以,話你知道,天堂所有親人都團聚,咁生離死別就冇咁難過。其實死後會點,根本冇人有把握....甚至,可以唔係大家咁想像...」


過了兩日,健虎終於和妻子,帶靖曦、靖思探虎媽。

靖曦、靖思一來,撲上去:「嬤嬤!!!」虎媽眉花眼笑:「來、來!抱抱!!」

虎媽很久沒有那麼快樂。

雲看到,對健虎夫婦說:「今日天氣好好,你可以同你阿媽到出面個花園和草地,同小朋友玩....」

雲用輪椅車虎媽下去,健虎一家和小朋友都到。一家人都在陽光普照的下午,在花園和草地玩。

虎媽很精神,和孫兒孫女玩。

健虎對雲說:「姑娘,真係多謝晒...」

「我好耐冇見你阿媽咁開心啦......你把握時間,多啲帶你啲小朋友來啦。佢真係好錫佢啲孫仔孫女....」

健虎沉吟不語。


這天健虎一個人來探虎媽。

「阿虎,我諗過啦,我穩陣啲,都係想死之前做我最想做嘅野,唔想第日後悔」

「媽,你都信左耶穌啦,天父會看顧嘅,大家將來一定喺天家見。」健虎嘗試用信仰提醒母親。

「阿虎,你做投資嘅。投資嘅我真係唔識,但我都見過你瀨過幾次大野。你投資更在行,都一樣會瀨野,咁咩死左後永生、天堂嘅野咁大件事,你覺得你啲眼光會準得過你投資?」

健虎從沒有想過這點,一時答不了,只得說:「媽,你講咩阿?」

「阿虎,你投資損手嘅,都仲有得翻身,不過你搏緊死後生命,你錯左點算?」

健虎就用基督教信仰回答:「媽,你講咩阿?死後生命得有或者冇兩個可能,冇你咩都唔知,有咪上天堂,有贏冇輸!」

「阿虎,咩唔比死後生命唔係你講嗰回事?萬一死後我地原來都唔係去天堂,仲冇得再見,我如果唔趁我身體仲支持到,做我要做嘅野,旨意日後天堂再見,冇同我啲孫多啲時間一齊、我唔同阿玲講野,我死後咪永遠後悔??佛教就輪迴、唔知咩教又話死後點,你點知道邊個真?」

「媽,你講咩阿?聖經唔會呃你!」

「點解?聖經唔會呃我?」

「因為,聖經係神寫嘅!」

「你點知聖經係神寫嘅?」

「神話嘅!」

「你咪兜左個圈啦!似足我以前個刻薄老闆嘅講法:老闆永遠係啱嘅,點解?因為老闆話永遠係啱嘅囉!」

健虎說:「你要對神有信心,你應該相信你有永生!」

「阿虎,萬一,你錯呢?我地死後真係有永生,不過你去左唔知邊、我去左唔知邊,我見唔翻你地、見唔翻靖曦、靖思,我真係會癲!我到時,真係做鬼都唔放過你!」說著虎媽疾言厲色。

健虎不敢說下去。

這周末,健虎回到教會,到小組代禱時間。小組都知道健虎媽媽患癌症的事,知道健虎媽媽信主,上星期都感謝神。

健虎將媽媽的事告訴小組。

組長阿光說:「我地要為阿虎媽禱告。」

組員A:「求神保手虎媽嘅心,希望虎媽唔好動搖!」

組長阿光問:「阿虎,你阿媽想你點?」

健虎說:「阿媽從來未同對孫去過旅行,最想今年,同靖曦、靖思去澳洲,順便探我家姐.......我打算應承佢....」

組員A:「你阿媽咁嘅想法,其實係比魔鬼誘惑,佢唔信天父安排。根本佢冇需要擔心,日後大家都可以喺天家見,澳洲再好玩都唔會好得過天家」

其他組員附和....

健虎說:「阿媽好堅持,而且,我都希望阿媽臨死開心啲,仲有,佢真係想見下家姐....而且小朋友上次去澳洲都好中意家姐....」

組員A:「你阿媽係唔夠信心就真....,驚將來永生唔係聖經講嗰回事、咪死都要去,我不認為你應該遷就佢呢個出於不信嘅意願,咁唔係神嘅心意!」

健虎說:「佢老人家,我都係想佢開心,唔通都有錯?佢係我阿媽啊!」

組員A:「阿媽大定係神大?當然係神大!」

健虎一聽,勃然大怒,積壓多月擔憂母親的壓力爆發,大吼:「你調X樣,你有冇阿媽生㗎????」健虎站起來,像是要打組員A那樣。

組長阿光馬上勸止:「阿虎,唔好咁。人地都係想從聖經教導提醒你.....」

健虎怒道:「阿光,條.....佢咁講你唔覺得過分嘅咩?而加講緊嗰個係我病緊、命不久矣嘅阿媽!」

組員A還不識趣,繼續說:「阿媽就大晒?病緊、命不久矣就可以做啲唔合神心意嘅野!只怕你阿媽當初決志,都唔係聖靈嘅感動,係佢自己想走去信....」

健虎大怒,撲上去組員A把他從凳上推下地上,組員忙把兩人分隔開。

健虎不斷叫:「嗰個係我阿媽!嗰個係我阿媽!」

突然,健虎瞿然一驚:「嗰個係我阿媽!嗰個係我阿媽!」

此後三星期,健虎和妻子、健熊都同公司請假,健虎替對孩子向學校請假,買機票、訂酒店等等。

一行人,去了澳洲著名地方,到澳洲大堡礁,有團友知道虎媽的事,玩潛水,個個都幫手,虎媽笑得合不攏嘴。

虎媽像個大孩子,頑皮到要靖曦、靖思負責「管教」嬤嬤。

虎媽和孫仔孫女不斷玩,一切澳洲能玩的都和孫仔孫女盡情玩。到墨爾本健虎家姐健玲那裡。

健玲和虎媽擁抱。原來最美好就是和最愛的人一齊。

健虎後來知道,健玲已經不信耶穌。

晚上,健虎、健熊和健玲談話。

「你來澳洲,因咩事唔再信?點解你一句都唔同我地商量?」健虎問。

健玲說:「呢啲係我自己嘅決定。其實,我一路都有懷疑,來到澳洲,同大學做野,接觸好多我以前未學過嘅,覺得自己好傻,做咩要信。」

健玲說:「總算阿媽有得了左佢心願。講真,你地邊個真係知道死左之後咩事?如果好似無神論咁講,咩都冇都好D,如果係有另外一個世界,但你地攪錯,阿媽旨意天父,冇來旅行,佢死左真係有永生冇天國,你點對得佢住?阿媽最疼愛靖曦、靖思,如果冇旅行,你地想下啦。」

健虎、健熊不知如何答。

虎媽回港,回到寧養院,第二日病情就急劇惡化,下午還能看電子相簿大家旅行的合照,晚上就昏迷不醒。

健虎和妻子、健熊都在。看護阿雲也在。

健虎滿臉淚水。

雲說:「嗰日伯母落機,返到來,開心到好似開籠雀咁,拎手信分比大家,比D旅行相大家睇...」

健虎看電子相簿大家旅行的合照。

雲說:「你做得好啱,你成全左伯母心願。佢好開心滿足....」

健虎公事包袋著教會小組送給虎媽的聖經,他拿出來看,搖了搖頭。

「神嘅心意?我這次是順我自己嘅心意、我阿媽嘅心意,我先冇後悔....」

健虎不斷想媽媽的話:「阿虎,咩唔比死後生命唔係你講嗰回事?萬一死後我地原來都唔係去天堂,仲冇得再見,我地死後真係有永生,不過你去左唔知邊、我去左唔知邊,我見唔翻你地、見唔翻靖曦、靖思,我真係會癲!」

虎媽最後安詳去世。

健虎沒有用基督教儀式為母親舉殯。

(完)

(我不是說我相信死後有生命,不過我要指出,基督教的死後盼望,都是沒有把握的,真正有把握的,就是我們現在的生命。)

4 comments:

Jonathan Sum said...

貓姐請看看這裡 https://www.facebook.com/jonathan.sum1/posts/4859054534191?comment_id=4465423&offset=0&total_comments=777&ref=notif&notif_t=feed_comment

Jonathan Sum said...

貓姐,請你看看這裡https://www.facebook.com/yongqin.li

nazarene said...

聖經說在今生要愛惜光陰,關愛身邊的親友,作個好撒瑪利亞人,幫助有需要的人!
作父母的,不要惹兒女氣……作丈夫的,要愛妻子……與鄰居和睦相處……

nazarene said...

聖經說作老板的,要善待工人,不可虧欠工錢……學生要尊重老師……年長的對待年輕的猶如對待自己的寶貝兒女……

西洋笑話 - 次次來次次更新